Bewertung: 5 / 5

Stern aktivStern aktivStern aktivStern aktivStern aktiv
 

Diät

 

Scheen laungsaum werd i jetzt verruckt´

weu mi der blede Hunger druckt

 

derf nix ess´n, derf nix trink´n

weu mir sunst de Kilos wink´n

 

von meiner Personenwååg

in der Fruah aum next´n Tåg

 

tua ållaweul nur Hunger leid´n

i wüll wås ess´n, i kennt schrei´n

 

åba wås tuast net ålles, waunst net willst,

daß du aus åll´n Näht´n quillst

 

Bewegung warad wirklich g´sund

doch dabei wird dei´Körper wund,

 

weul er ´s net g´wohnt is wås zum schåff´n —

und aa weu di de Leit aungåff´n

 

es is dir ålles wirklich z´wieda,

vielleicht probier i´ ´s mit an Mieda?

 

Doch waun i wüll, daß ´s G´wicht weggeht,

daun hülft ma hoit nur a Diät

 

håb heit gaunz brav durchgehoit´n

den gaunz´n Tåg nur Åpf´lspoit´n

 

doch håb´i in da Fruah schon denkt´

daß mir auf d´Nåcht da Måg´n aushängt

 

g´schwind niedaleg´n — daun is es måchboar

åba es is erscht in da Fruah de Nåcht goar

 

tua i zur Åbwechslung daun fernschau´n

siech i wia s´ålle einehaun

 

a fett´s Bratl oda Stölz´n

i tua von links nåch rechts mi wölz´n

 

i steh auf und tiger umanaund

wiaso schliaf i eigentle ins G´waund?

 

Wüll i an Spaziergaung måch´n?

waß ´s sölba net, des san so Såch´n

 

i beweg mi wia in Trance

und do bin i a schon vor´m Haus

 

wüll de Siedlung nur umrund´n

doch daun håb i wås besser´s g´fund´n

 

bei dem Chines´n sollt i wend´n!

doch daun denk i nur noch aun Ent´n

 

i kehr ein und iß mit Freid´

de Diät håt wirklich Zeit

 

bessa i bin sått und dicklich

oiswia frustriert und goar net glicklich