Menschen

So laung i in der Oarbeit woar håb i mi beschwert:

de Intelligenz der Leit mit de i´ ´s z´tuan håb is net vül wert.

Waun i denk, då woarn Kolleg´n dabei,

wås i då ertråg´n håb, woar net´s gölbe vom Ei.

De an, de haum g´soff´n — leida,

de aundern woarn nüchtern aa net vül gscheida.

Daun håt´s wölche geb´n, de haum zwoa wås g´oarbeit´,

doch denen ean´ Nåchteil woar Bösoartigkeit.

Aum schlimmst´n woarn åba de, de im Denk´n neutral woarn,

im Haund´ln woarn des nämlich d´greßt´n Noarrn.

Doch net nur d´Kolleg´n, — aa de Kundschåft´n,

woarn teuweis wirklich nur schwer zu verkråft´n.

Eana ålle Tåg des sölbe erklär´n is a Kunst,

waunst gaunz genau waßt:´s is wieda umsunst.

Se haum´s zwoar net bes g´mant, wollt´n mi net sekkier´n,

åba vül Dummheit geht aa aun de Nier´n.

Då håb i an g´håbt, der håt mi jedesmoi quölt,

der Hintergrund woar: eam håt a Aunspråch g´föhlt.

Doch maunchmoi woari aa gaunz z´fried´n,

haum sa si´mit blede Fråg´n für mi entschied´n:

Wollt´ns mei Meinung zu wås hearn,

haßt des doch nur: — se haum mi gern.

Ihr kennts des jetz seg´n so wias ihr wollt´s,

åba des G´fühl erfüllt mi heit nu mit Stolz.

Daß i ´s net leicht g´håbt håb im Leb´n,

håt mir a innere Stärke geb´n.

Drum : håbt´s ihr Leit um eich, de eich quöl´n bis auf´s Bluat,

es kummt de Zeit, då woar a des für wås guat:

Hätt´n s´ mi mit eanara Bledheit net goar so g´jåg´n,

hätt mi woahrscheinle da Pensionsschock daschlåg´n.