Nachtaktiv
Den gaunz´n Tåg bin i letschert und miad,
außer waun´s Zeit zum Schlåf´ngeh´ wird.
Waun si´ de aunder´n in de Bett´n schmeiß´n,
do kennt i der Wölt an Hax´n ausreiß´n.
Auf amoi werd´ i g´schaftig und fit,
nur mei Umwölt spü´t leida net mit.
Hätt´ i de Power für a Shoppingtour,
sperr´n ma de G´schäfta vur da Nås´n zua.
Entschliaß i mi dazua, daß i amoi im Gåsthaus iß,
kriag i nix mehr, weul Sperrstund´ is.
Sogoar von meine Kåtz´n fühl´ i mi in Stich låss´n:
nåchtaktive Viecher? — De san vur mir im Bett — i kaun´s net fåss´n!
Daun faungen s´ aa nu aun zum rearn,
waun s´ um Mitternåcht mein Staubsauger hearn.
Då is´s scho´ guat, daß i ka´ Famülie håb,
so stört´s niemaund, waun i in da Nåcht mein Goart´n umgråb.
Oder måch i mi dabei vielleicht verdächtig waun mi de Nåchbarn seh´n,
de glaub´n zum Schluß goar: es is wås g´scheh´n.
Vielleicht schick´n s´ ma de Gendarmerie, damit sa se sicher fühl´n,
wia erkläre denn denen mein Oarbeitswüll´n?
Oba vielleicht såg´n s´ grådaglei´ dazua:
„Kumman s´ zu uns, wir haum vom Nåchtdienst eh scho´ gnua."
Und då fållt´s ma wia Schupp´n von de Aug´n:
wer den gaunz´n Tåg nix weidabringt, miaßat doch für´n Polizeidienst taug´n.
Murg´n in da Fruah geh i glei hin,
waun i net zu miad dazua bin.