Traum
Mir håt tramt i war verlurn,
in an Universum voller Uhr´n.
Überåll håt´s tickt und tackt,
im Rekord håb i nåch Weckern prackt.
Dabei håb i mi in aner Unruh verfaungan,
de Federn hålt mi fest ois wiara Zaungan.
Gråd håb i mi aus meiner mißlich´n Låge befreit,
kollidier i mit aner Uhr, de kuckuck schreit.
Schweißgebådet rutsch i aner Saunduhr durch´n Leib,
wo i bewegungslos lieg´nbleib.
Schick zum Himm´l a Gebet,
und wia munter in mein Bett.
Hear mein Maun: „Kuckuck, bist endlich bei dir?
Bevur i di nu moi weck geri ind´Arena zum Stier.
Saunft wollt i di aufweck´n
und net går a so daschreck´n,
bevur a läut hoit i dir den Wecker ans Uhr (=Ohr)
und du gibst ma a Watsch´n davur.
Wiari di liebevoll mit meinen Årmen umschling,
benimmst di ois war ma im Ring.
I såg >kuckuck< und küß deine Aigerl,
då haust ma mit dein Kopf a Feigerl.
Daun wind´st und drahst di gaunz komisch
und liegst plötzlich wiara toter Fisch."
I hear ma des aun — bring d´Aug´n nu net auf
und såg nåch ana Weu zu eam drauf:
„Du håst oilleweu Ausred´n, du håst an Pecker,
i waß gaunz genau, du bist a Wecker."